ಟ್ರಂಪ್ ಯೂ-ಟರ್ನ್: ಯುದ್ಧದಿಂದ ಹಿಂದೆ ಸರಿಯುವ ಸಂಕೇತ
ಅಮೆರಿಕ ಅಧ್ಯಕ್ಷ ಡೊನಾಲ್ಟ್ ಟ್ರಂಪ್ ಆರಂಭದಲ್ಲಿ ಇರಾನ್ ವಿರುದ್ಧ ಕಠಿಣ ನಿಲುವು ತಾಳಿದ್ದರು. ಟೆಹ್ರಾನ್ ತನ್ನ 15 ಅಂಶಗಳ ಕದನ ವಿರಾಮ ಚೌಕಟ್ಟನ್ನು ಸ್ವೀಕರಿಸದಿದ್ದರೆ ಸೈನಿಕ ಕ್ರಮಗಳನ್ನು ಮತ್ತಷ್ಟು ತೀವ್ರಗೊಳಿಸುವುದಾಗಿ ಅವರು ಸ್ಪಷ್ಟ ಎಚ್ಚರಿಕೆ ನೀಡಿದ್ದರು. ಈ ಚೌಕಟ್ಟಿನಲ್ಲಿ ಇರಾನ್ ತನ್ನ ಅಣು ಹಾಗೂ ಕ್ಷಿಪಣಿ ಕಾರ್ಯಕ್ರಮಗಳನ್ನು ನಿಲ್ಲಿಸುವುದು, ಯುರೇನಿಯಂ ಶುದ್ಧೀಕರಣವನ್ನು ಸ್ಥಗಿತಗೊಳಿಸುವುದು ಮತ್ತು ಹರ್ಮುಜ್ ಜಲಸಂಧಿಯನ್ನು ಸಂಪೂರ್ಣವಾಗಿ ತೆರೆಯುವುದು ಸೇರಿದಂತೆ ಹಲವು ಕಠಿಣ ಬೇಡಿಕೆಗಳು ಸೇರಿದ್ದವು.
ಆದರೆ ಇತ್ತೀಚಿನ ಬೆಳವಣಿಗೆಯಲ್ಲಿ ಟ್ರಂಪ್ ತಮ್ಮ ನಿಲುವಿನಲ್ಲಿ ಮಹತ್ತರ ಬದಲಾವಣೆ ತೋರಿದ್ದಾರೆ. ಇರಾನ್ ಜೊತೆ ಒಪ್ಪಂದವಿಲ್ಲದಿದ್ದರೂ, ಅಮೆರಿಕವು ತನ್ನ ಮಿಲಿಟರಿ ಕಾರ್ಯಾಚರಣೆಯನ್ನು 2–3 ವಾರಗಳಲ್ಲಿ ಕೊನೆಗೊಳಿಸಬಹುದು ಎಂದು ಅವರು ಹೇಳಿದ್ದಾರೆ. “ನಾವು ಶೀಘ್ರದಲ್ಲೇ ಹೊರಡುತ್ತೇವೆ” ಎಂಬ ಹೇಳಿಕೆ ಮೂಲಕ ಯುದ್ಧದಿಂದ ಹೊರಬರುವ ಮನೋಭಾವವನ್ನು ಸೂಚಿಸಿದ್ದಾರೆ. ಇದೇ ವೇಳೆ, ಹರ್ಮುಜ್ ಜಲಸಂಧಿಯನ್ನು ತೆರೆಯುವ ಹೊಣೆಗಾರಿಕೆ ಅಮೆರಿಕದಷ್ಟೇ ಅಲ್ಲ, ಅದನ್ನು ಅವಲಂಬಿಸಿರುವ ಇತರ ದೇಶಗಳ ಮೇಲೂ ಇದೆ ಎಂದು ಹೇಳುವ ಮೂಲಕ ತಮ್ಮ ಹಿಂದಿನ ನಿಲುವಿನಿಂದ ಯೂ-ಟರ್ನ್ ತೆಗೆದುಕೊಂಡಿದ್ದಾರೆ.
15 ಅಂಶಗಳ ಶಾಂತಿ ಪ್ರಸ್ತಾವನೆ: ಮಾತುಕತೆಗೂ ಮುನ್ನವೇ ಗೊಂದಲ
ಅಮೆರಿಕ ಆಡಳಿತವು ಮಧ್ಯಪ್ರಾಚ್ಯದ ಯುದ್ಧವನ್ನು ಅಂತ್ಯಗೊಳಿಸಲು ಇರಾನ್ಗೆ 15 ಅಂಶಗಳ ಶಾಂತಿ ಯೋಜನೆಯನ್ನು ಮುಂದಿಟ್ಟಿತ್ತು. ಈ ಯೋಜನೆ ಪಾಕಿಸ್ತಾನದ ಮಧ್ಯಸ್ತಿಕೆಯ ಮೂಲಕ ಇರಾನ್ಗೆ ತಲುಪಿದವು ಎನ್ನುವಂತೆ ವರದಿಗಳು ತಿಳಿಸಿವೆ. ಇದರಲ್ಲಿ ಇರಾನ್ ತನ್ನ ದೇಶದ ಪ್ರಮುಖ ಅಣು ಕೇಂದ್ರಗಳನ್ನು ನಿಷ್ಕ್ರಿಯಗೊಳಿಸುವುದು, ಕ್ಷಿಪಣಿ ಅಭಿವೃದ್ಧಿಯನ್ನು ನಿಲ್ಲಿಸುವುದು, ಪ್ರಾಕ್ಸಿ ಸಂಘಟನೆಗಳಿಗೆ (ಉಗ್ರವಾದಿ) ಬೆಂಬಲ ಕಡಿಮೆ ಮಾಡುವುದು ಸೇರಿದಂತೆ ಪ್ರಮುಖ ಅಂಶಗಳು ಸೇರಿದ್ದವು.
ಆದರೆ ಇರಾನ್ ಈ ಪ್ರಸ್ತಾವನೆಯನ್ನು ತಿರಸ್ಕರಿಸುವುದರ ಜೊತೆಗೆ, ಅಮೇರಿಕಾದ ಶಾಂತಿ ಪ್ರಸ್ತಾವನೆಯನ್ನೇ ಅಣಕ ಮಾಡಿತು. ಅಮೆರಿಕದೊಂದಿಗೆ ಯಾವುದೇ ಮಾತುಕತೆ ನಡೆಯುವುದಿಲ್ಲ ಎಂದು ಇರಾನ್ ಸ್ಪಷ್ಟಪಡಿಸಿತು.
ತದನಂತರ ಈ ಪ್ರದೇಶದಲ್ಲಿ ಯುದ್ಧದ ತೀವ್ರತೆ ಹೆಚ್ಚಾಗಿ, ಎರಡೂ ಕಡೆಯಿಂದ ಕ್ಷಿಪಣಿ ಹಾಗೂ ಡ್ರೋನ್ ದಾಳಿಗಳು ಮುಂದುವರಿದವು. ಅಮೇರಿಕ ಹಾಗೂ ಇಸ್ರೇಲ್, ಇರಾನ್ ಮೇಲೆ ಮುಗಿಬಿದ್ದವು. ಅಲ್ಲದೆ, ಅಮೇರಿಕವು ನಿಯೋಜಿಸಿದ ಹೆಚ್ಚುವರಿ ಸೈನ್ಯವು ಯುದ್ಧ ಪರಿಸ್ಥಿತಿಯನ್ನು ಇನ್ನಷ್ಟು ಉದ್ವಿಗ್ನಗೊಳಿಸಿತು. ಇಸ್ರೇಲ್ ಒಳಗೊಂಡಂತೆ ಅಮೇರಿಕಾ ದೇಶಕ್ಕೆ ಬೆಂಬಲಿಸಿ ತನ್ನ ಮೇಲೆ ಅಕ್ರಮಣಕ್ಕೆ ಕಾರಣರಾದ ಮಧ್ಯಪ್ರಾಚ್ಯದ ಹಲವು ದೇಶಗಳ ಮೇಲೆ ದಾಳಿ ಮಾಡಲು ಇರಾನ್ ಯೋಜನೆ ಹಾಕಿಕೊಂಡಿತು.
ಇಸ್ರೇಲ್ ಹಾಗೂ ಅಮೇರಿಕಕ್ಕೆ ಬೆಂಬಲ ನೀಡಿದ ಮಧ್ಯಪ್ರಾಚ್ಯದ ಹಲವು ರಾಷ್ಟ್ರಗಳನ್ನೂ ಗುರಿಯಾಗಿಸಿಕೊಂಡು ಇರಾನ್ ದಾಳಿಗಳನ್ನು ಆರಂಭಿಸಿತು. ಈ ಮೂಲಕ ಯುದ್ಧವು ಕೇವಲ ಎರಡು ರಾಷ್ಟ್ರಗಳ ನಡುವಿನ ಸಂಘರ್ಷವಾಗಿರದೇ, ವಿಸ್ತೃತ ಪ್ರಾದೇಶಿಕ ಸಂಘರ್ಷದ ರೂಪ ಪಡೆಯುವ ಲಕ್ಷಣಗಳನ್ನು ತೋರಿಸಿತು. ಇರಾನ್ ತನ್ನ ಪ್ರತಿಕ್ರಿಯೆಯನ್ನು ಮತ್ತಷ್ಟು ಗಟ್ಟಿಗೊಳಿಸುತ್ತಾ, ಶತ್ರು ರಾಷ್ಟ್ರಗಳಿಗೆ ಸ್ಪಷ್ಟ ಎಚ್ಚರಿಕೆಯನ್ನು ನೀಡುವ ರೀತಿಯಲ್ಲಿ ಕ್ರಮಗಳನ್ನು ಮುಂದುವರಿಸಿತು.
ಇಸ್ರೇಲ್ ಕಠಿಣ ನಿಲುವು: ಯುದ್ಧ ಮುಂದುವರಿಯಲಿದೆ
ಅಮೆರಿಕದ ನಿಲುವಿಗೆ ವಿರುದ್ಧವಾಗಿ, ಇಸ್ರೇಲ್ ಪ್ರಧಾನಮಂತ್ರಿ ಬೆಂಜಮಿನ್ ನೆತನ್ಯಾಹು (Benjamin Netanyahu) ಯುದ್ಧವನ್ನು ನಿಲ್ಲಿಸುವ ಯಾವುದೇ ಲಕ್ಷಣ ತೋರಿಲ್ಲ. “ಇರಾನ್ನ ಭಯೋತ್ಪಾದಕ ಆಡಳಿತವನ್ನು ಸಂಪೂರ್ಣವಾಗಿ ಹತ್ತಿಕ್ಕುವವರೆಗೂ ಕಾರ್ಯಾಚರಣೆ ಮುಂದುವರಿಯುತ್ತದೆ” ಎಂದು ಅವರು ಘೋಷಿಸಿದ್ದಾರೆ. ಯಹೂದಿ ಪಾಸೋವರ್ ಹಬ್ಬದ ಮುನ್ನಾದಿನದ ದೂರದರ್ಶನ ಭಾಷಣದಲ್ಲಿ ಅವರು ಇಸ್ರೇಲ್ ದೇಶವು ತನ್ನ ಧ್ಯೇಯದಲ್ಲಿ ದೃಢವಾಗಿದೆ ಎಂದು ತಿಳಿಸಿದ್ದಾರೆ.
ನೇತನ್ಯಾಹು ಅವರ ಹೇಳಿಕೆಯ ಪ್ರಕಾರ, ಇಸ್ರೇಲ್ ಈಗಾಗಲೇ ಮಧ್ಯಪ್ರಾಚ್ಯದ ಶಕ್ತಿಶಾಲಿ ರಾಷ್ಟ್ರವಾಗಿ ಹೊರಹೊಮ್ಮಿದ್ದು, ಯುದ್ಧದ ಮೂಲಕ ಪ್ರಾದೇಶಿಕ ಸಮೀಕರಣಗಳನ್ನು ಬದಲಾಯಿಸಿದೆ. ಈ ನಿಲುವು ಅಮೆರಿಕದ ಶಾಂತಿ ಸೂಚನೆಗಳಿಗೆ ಸಂಪೂರ್ಣ ವಿರುದ್ಧವಾಗಿದೆ.
ಇರಾನ್ ಪ್ರತಿಕ್ರಿಯೆ: ಶಂಕೆ ಮತ್ತು ಷರತ್ತುಗಳು
ಇದೇ ಸಮಯದಲ್ಲಿ ಇರಾನ್ ಅಧ್ಯಕ್ಷ ಮಸೌದ್ ಪೆಜೆಶ್ಕಿಯನ್ (Masoud Pezeshkian) ಯುದ್ಧ ಅಂತ್ಯಗೊಳಿಸುವ ಬಗ್ಗೆ ಸಿದ್ಧತೆ ಇದೆ ಎಂದು ಸೂಚಿಸಿದರೂ, ತಮ್ಮ ದೇಶದ ಸುರಕ್ಷತೆಗೆ ಖಾತರಿ ಬೇಕೆಂದು ಹೇಳಿದ್ದಾರೆ. ಶತ್ರು ರಾಷ್ಟ್ರಗಳು ಮತ್ತೆ ದಾಳಿ ಮಾಡದಂತೆ ಭರವಸೆ ನೀಡಿದರೆ ಮಾತ್ರ ಮುಂದಿನ ಹೆಜ್ಜೆ ಇಡುವುದಾಗಿ ಅವರು ಸ್ಪಷ್ಟಪಡಿಸಿದ್ದಾರೆ.
ಇದರ ಜೊತೆಗೆ, ಇರಾನ್ ಅಮೆರಿಕದ ಮೇಲೆ ನಂಬಿಕೆ ಇಲ್ಲವೆಂಬುದನ್ನು ಪುನರುಚ್ಚರಿಸಿದೆ. ಹಿಂದಿನ ಅನುಭವಗಳನ್ನು ಉಲ್ಲೇಖಿಸಿ, ಅಮೆರಿಕದ ಭರವಸೆಗಳನ್ನು ಅನುಮಾನದಿಂದಲೇ ನೋಡುತ್ತಿದೆ. ಈ ಕಾರಣದಿಂದಲೇ ಯಾವುದೇ ಒಪ್ಪಂದದ ಸಾಧ್ಯತೆ ಇನ್ನೂ ಅನುಮಾನಾಸ್ಪದವಾಗಿದೆ.
ವಿಭಿನ್ನ ಮಾರ್ಗಗಳು: ಮೈತ್ರಿಯಲ್ಲಿ ಬಿರುಕು?
ಯುದ್ಧ ಆರಂಭದಿಂದ ಇಲ್ಲಿಯವರೆಗೂ ಒಟ್ಟಾಗಿ ಕಾರ್ಯನಿರ್ವಹಿಸಿದ್ದ ಅಮೆರಿಕ ಮತ್ತು ಇಸ್ರೇಲ್ ಇದೀಗ ವಿಭಿನ್ನ ದಿಕ್ಕುಗಳಲ್ಲಿ ಸಾಗುತ್ತಿರುವುದು ಸ್ಪಷ್ಟವಾಗಿದೆ. ವರದಿಗಳ ಪ್ರಕಾರ, ಇರಾನ್ ವಿರುದ್ಧ ದಾಳಿ ಮಾಡಲು ಟ್ರಂಪ್ ಅವರನ್ನು ಪ್ರೇರೇಪಿಸಿದವರಲ್ಲಿ ನೇತನ್ಯಾಹು ಪ್ರಮುಖರಾಗಿದ್ದರು. ಆದರೆ ಈಗ ಅಮೆರಿಕ ಯುದ್ಧದಿಂದ ಹಿಂದೆ ಸರಿಯಲು ಯೋಚಿಸುತ್ತಿರುವಾಗ, ಇಸ್ರೇಲ್ ಮಾತ್ರ ತನ್ನ ದಾಳಿ ಮುಂದುವರಿಸಲು ಬದ್ಧವಾಗಿದೆ.
ಈ ಬೆಳವಣಿಗೆಗಳು ಎರಡೂ ದೇಶಗಳ ನಡುವಿನ ತಂತ್ರಜ್ಞಾನದ ಭಿನ್ನಾಭಿಪ್ರಾಯವನ್ನು ಸೂಚಿಸುತ್ತವೆ. ಅಮೆರಿಕ ರಾಜತಾಂತ್ರಿಕ ಪರಿಹಾರ ಅಥವಾ ತಾತ್ಕಾಲಿಕ ನಿರ್ಗಮನದತ್ತ ಸಾಗುತ್ತಿರುವಾಗ, ಇಸ್ರೇಲ್ ಸಂಪೂರ್ಣ ಸೈನಿಕ ಜಯದತ್ತ ಗಮನಹರಿಸಿದೆ.
ಸಮಗ್ರ ವಿಶ್ಲೇಷಣೆ: ಅನಿಶ್ಚಿತತೆಯ ಮಧ್ಯೆ ಯುದ್ಧ
ಒಟ್ಟಾರೆಯಾಗಿ ನೋಡಿದರೆ, ಮಧ್ಯಪ್ರಾಚ್ಯದ ಯುದ್ಧದಲ್ಲಿ ಸ್ಪಷ್ಟ ದಿಕ್ಕು ಕಾಣಿಸುತ್ತಿಲ್ಲ. ಡೊನಾಲ್ಟ್ ಟ್ರಂಪ್ ಅವರ ಯೂ-ಟರ್ನ್ ಅಮೆರಿಕದ ತಂತ್ರದಲ್ಲಿ ಬದಲಾವಣೆಯನ್ನು ಸೂಚಿಸಿದರೆ, ಬೆಂಜಮಿನ್ ನೆತನ್ಯಾಹು ಅವರ ಕಠಿಣ ನಿಲುವು ಯುದ್ಧವು ಇನ್ನಷ್ಟು ಮುಂದುವರಿಯುವ ಸೂಚನೆ ನೀಡುತ್ತದೆ. ಇರಾನ್ ಕೂಡ ತನ್ನ ರಾಷ್ಟ್ರೀಯ ಭದ್ರತಾ ಹಿತಾಸಕ್ತಿಗಳನ್ನು ಮೊದಲ ಆದ್ಯತೆಯಾಗಿ ಪರಿಗಣಿಸುತ್ತಿರುವುದರಿಂದ, ತಕ್ಷಣದ ಶಾಂತಿ ಸಾಧನೆಯ ಸಾಧ್ಯತೆಗಳು ಕಡಿಮೆಯಾಗಿ ಕಾಣಿಸುತ್ತಿವೆ.
ಇದರಿಂದ ಜಾಗತಿಕ ಆರ್ಥಿಕತೆ, ಇಂಧನ ಬೆಲೆಗಳು ಮತ್ತು ಭದ್ರತಾ ಪರಿಸ್ಥಿತಿಯ ಮೇಲೆ ದೀರ್ಘಕಾಲೀನ ಪರಿಣಾಮ ಬೀರುವ ಸಾಧ್ಯತೆ ಇದೆ. ಯುದ್ಧದ ಅಂತ್ಯ ಯಾವ ದಿಕ್ಕಿನಲ್ಲಿ ಸಾಗುತ್ತದೆ ಎಂಬುದು ಇನ್ನೂ ಅನಿಶ್ಚಿತವಾಗಿಯೇ ಉಳಿದಿದೆ.