ಕೇಂದ್ರ ಸರ್ಕಾರವು ಜಾರಿಗೆ ತಂದಿರುವ ಹಲವು ಪ್ರೋತ್ಸಾಹಕ ಯೋಜನೆಗಳಲ್ಲಿ ಪ್ರಧಾನ ಮಂತ್ರಿ ಮುದ್ರಾ ಯೋಜನೆಯು (PMMY) ಒಂದಾಗಿದೆ. ಈ ಯೋಜನೆಯಡಿ ಕೃಷಿಯೇತರ ವಲಯದಲ್ಲಿ ತೊಡಗಿರುವ ಸೂಕ್ಷ್ಮ ಮತ್ತು ಸಣ್ಣ ಉದ್ಯಮಗಳಿಗೆ ರೂ. 20 ಲಕ್ಷಗಳವರೆಗೆ ಸಾಲ ಸೌಲಭ್ಯವನ್ನು ನೀಡಲಾಗುತ್ತದೆ. ಉತ್ಪಾದನಾ ಚಟುವಟಿಕೆಗಳು, ವ್ಯಾಪಾರ ಮತ್ತು ಸೇವಾ ಕ್ಷೇತ್ರಗಳೂ ಸೇರಿದಂತೆ ಕೋಳಿ ಸಾಕಣೆ, ಹೈನುಗಾರಿಕೆ, ಜೇನು ಸಾಕಣೆ ಮುಂತಾದ ಕೃಷಿಗೆ ಸಂಬಂಧಿತ ಚಟುವಟಿಕೆಗಳಿಗೂ ಈ ಯೋಜನೆಯಡಿ ಆರ್ಥಿಕ ನೆರವು ಲಭ್ಯವಿದೆ.
ಈ ಯೋಜನೆಯ ಉದ್ದೇಶವು ಕಾರ್ಪೊರೇಟ್ ಅಲ್ಲದ, ಸಣ್ಣ ಪ್ರಮಾಣದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಉದ್ಯಮಿಗಳಿಗೆ ಹಣಕಾಸಿನ ಬೆಂಬಲ ನೀಡುವುದು. ಸಣ್ಣ ಉತ್ಪಾದನಾ ಘಟಕಗಳು, ಸೇವಾ ವಲಯದ ಸಂಸ್ಥೆಗಳು, ಚಿಲ್ಲರೆ ಅಂಗಡಿಗಳು, ಹಣ್ಣು-ತರಕಾರಿ ಮಾರಾಟಗಾರರು, ಟ್ರಕ್ ನಿರ್ವಾಹಕರು, ಆಹಾರ ಸೇವಾ ಕೇಂದ್ರಗಳು, ದುರಸ್ತಿ ಅಂಗಡಿಗಳು, ಯಂತ್ರೋಪಕರಣ ನಿರ್ವಾಹಕರು, ಸಣ್ಣ ಕೈಗಾರಿಕೆಗಳು, ಕುಶಲಕರ್ಮಿಗಳು, ಆಹಾರ ಸಂಸ್ಕರಣಾ ಘಟಕಗಳು ಸೇರಿದಂತೆ ಲಕ್ಷಾಂತರ ಏಕಸ್ವಾಮ್ಯ ಅಥವಾ ಪಾಲುದಾರಿಕೆ ಆಧಾರಿತ ಉದ್ಯಮಗಳು ಈ ಯೋಜನೆಯ ಪ್ರಯೋಜನ ಪಡೆಯಬಹುದು.
ಪ್ರಧಾನ ಮಂತ್ರಿ ಮುದ್ರಾ ಯೋಜನೆಯಡಿಯಲ್ಲಿ ಸಾಲವನ್ನು ಕೆಳಕಂಡ ಸಂಸ್ಥೆಗಳ (MLIs) ಮೂಲಕ ಪಡೆಯಬಹುದು.
- ಸಾರ್ವಜನಿಕ ವಲಯದ ಬ್ಯಾಂಕುಗಳು
- ಖಾಸಗಿ ವಲಯದ ಬ್ಯಾಂಕುಗಳು
- ರಾಜ್ಯ ಸಹಕಾರಿ ಬ್ಯಾಂಕುಗಳು
- ಪ್ರಾದೇಶಿಕ ಗ್ರಾಮೀಣ ಬ್ಯಾಂಕುಗಳು
- ಸೂಕ್ಷ್ಮ ಹಣಕಾಸು ಸಂಸ್ಥೆಗಳು (MFI)
- ಬ್ಯಾಂಕೇತರ ಹಣಕಾಸು ಕಂಪನಿಗಳು (NBFC)
- ಸಣ್ಣ ಹಣಕಾಸು ಬ್ಯಾಂಕುಗಳು (SFB)
- ಮುದ್ರಾ ಲಿಮಿಟೆಡ್ ಮಾನ್ಯತೆ ಪಡೆದ ಇತರೆ ಹಣಕಾಸು ಮಧ್ಯವರ್ತಿಗಳು
ಬಡ್ಡಿದರ
ಮುದ್ರಾ ಯೋಜನೆಯಡಿ ನೀಡಲಾಗುವ ಸಾಲಗಳ ಬಡ್ಡಿದರವನ್ನು, ಸಾಲ ನೀಡುವ ಸಂಸ್ಥೆಗಳು ಕಾಲಾನುಗುಣವಾಗಿ ನಿಗದಿಪಡಿಸುತ್ತವೆ. ಈ ಬಡ್ಡಿದರಗಳು ಭಾರತೀಯ ರಿಸರ್ವ್ ಬ್ಯಾಂಕ್ನ ಮಾರ್ಗಸೂಚಿಗಳ ಪ್ರಕಾರ ನಿರ್ಧಾರವಾಗುತ್ತವೆ. ಆದ್ದರಿಂದ ಪ್ರತಿ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಯಲ್ಲಿ ಬಡ್ಡಿದರದಲ್ಲಿ ಸ್ವಲ್ಪ ವ್ಯತ್ಯಾಸವಾಗಬಹುದು.
ಮುಂಗಡ ಶುಲ್ಕ / ಸಂಸ್ಕರಣಾ ಶುಲ್ಕ
ಬ್ಯಾಂಕುಗಳು ತಮ್ಮ ಆಂತರಿಕ ನಿಯಮಾವಳಿಗಳ ಪ್ರಕಾರ ಮುಂಗಡ ಶುಲ್ಕ ಅಥವಾ ಸಂಸ್ಕರಣಾ ಶುಲ್ಕವನ್ನು ವಿಧಿಸಬಹುದು. ಆದರೆ ‘ಶಿಶು’ ವರ್ಗದ ಸಾಲಗಳು (ರೂ. 50,000/- ವರೆಗೆ) ಸಾಮಾನ್ಯವಾಗಿ ಹೆಚ್ಚಿನ ಬ್ಯಾಂಕುಗಳಲ್ಲಿ ಮುಂಗಡ ಅಥವಾ ಸಂಸ್ಕರಣಾ ಶುಲ್ಕದಿಂದ ವಿನಾಯಿತಿ ಪಡೆಯುತ್ತವೆ. ಇದರಿಂದ ಸಣ್ಣ ಉದ್ಯಮಿಗಳಿಗೆ ಪ್ರಾರಂಭಿಕ ಹಂತದಲ್ಲಿ ಹೆಚ್ಚಿನ ಆರ್ಥಿಕ ಭಾರವಾಗುವುದಿಲ್ಲ.
ಗಮನಿಸಿ
ಮುದ್ರಾ ಸಾಲಗಳನ್ನು ನೀಡುವಲ್ಲಿ ಯಾವುದೇ ಏಜೆಂಟ್ಗಳು ಅಥವಾ ಮಧ್ಯವರ್ತಿಗಳನ್ನು ನೇಮಿಸಲಾಗಿಲ್ಲ. ಸಾಲಕ್ಕಾಗಿ ನೇರವಾಗಿ ಬ್ಯಾಂಕ್ ಅಥವಾ ಮಾನ್ಯತೆ ಪಡೆದ ಹಣಕಾಸು ಸಂಸ್ಥೆಗಳನ್ನು ಮಾತ್ರ ಸಂಪರ್ಕಿಸುವುದು ಸೂಕ್ತ.
ಪ್ರಯೋಜನಗಳು
ಉದ್ಯಮಕ್ಕೆ ಸಂಬಂಧಿಸಿದಂತೆ ಅವಶ್ಯಕತೆ, ಮತ್ತು ಅಭಿವೃದ್ಧಿಯ ಹಂತಗಳನ್ನಾದರಿಸಿ ಮುದ್ರಾ ಯೋಜನೆಯನ್ನು ನಾಲ್ಕು ವಿಭಾಗಗಳಾಗಿ ವಿಂಗಡಿಸಲಾಗಿದೆ : ‘ಶಿಶು’, ‘ಕಿಶೋರ್’, ‘ತರುಣ್’ ಮತ್ತು ‘ತರುಣ್ ಪ್ಲಸ್’.
- ಶಿಶು – ರೂ. 50,000/- ವರೆಗೆ ಸಾಲ ಸೌಲಭ್ಯ.
- ಕಿಶೋರ್ – ರೂ. 50,000/- ಕ್ಕಿಂತ ಹೆಚ್ಚು ಹಾಗೂ ರೂ. 5 ಲಕ್ಷದವರೆಗೆ ಸಾಲ.
- ತರುಣ್ – ರೂ. 5 ಲಕ್ಷದಿಂದ ರೂ. 10 ಲಕ್ಷದವರೆಗೆ ಸಾಲ.
- ತರುಣ್ ಪ್ಲಸ್ – ‘ತರುಣ್’ ವಿಭಾಗದ ಸಾಲವನ್ನು ಯಶಸ್ವಿಯಾಗಿ ಮರುಪಾವತಿಸಿದ ಉದ್ಯಮಿಗಳಿಗೆ ರೂ. 20 ಲಕ್ಷದವರೆಗೆ ಸಾಲ ಸೌಲಭ್ಯವನ್ನು ನೀಡಲಾಗುತ್ತದೆ.
ಈ ಆಧಾರದಲ್ಲಿ ಉದ್ಯಮಿಗಳು ವ್ಯವಹಾರದ ಹಂತಕ್ಕೆ ಅನುಗುಣವಾಗಿ ಸೂಕ್ತ ಪ್ರಮಾಣದ ಹಣಕಾಸು ನೆರವನ್ನು ಪಡೆಯಬಹುದು.
ಅರ್ಹತೆ
ಮುದ್ರಾ ಯೋಜನೆಯಡಿ ಕೆಳಕಂಡಂತೆ ಸಾಲವನ್ನು ಪಡೆಯಬಹುದು.
- ವ್ಯಕ್ತಿಗಳು
- ಏಕಸ್ವಾಮ್ಯ (ಸ್ವಂತ) ಉದ್ಯಮಗಳು
- ಪಾಲುದಾರಿಕೆ ಸಂಸ್ಥೆಗಳು
- ಪ್ರೈವೇಟ್ ಲಿಮಿಟೆಡ್ ಕಂಪನಿಗಳು
- ಸಾರ್ವಜನಿಕ ಲಿಮಿಟೆಡ್ ಕಂಪನಿಗಳು
- ಇತರೆ ಕಾನೂನುಬದ್ಧ ನೋಂದಾಯಿತ ಸಂಸ್ಥೆಗಳು
ಟಿಪ್ಪಣಿ 01: ಅರ್ಜಿದಾರರು ಯಾವುದೇ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಯಲ್ಲಿ ಸುಸ್ತಿದಾರರಾಗಿರಬಾರದು. ಜೊತೆಗೆ, ಅವರ ಕ್ರೆಡಿಟ್ ಇತಿಹಾಸ ತೃಪ್ತಿಕರವಾಗಿರಬೇಕು.
ಟಿಪ್ಪಣಿ 02: ಕೈಗೊಳ್ಳಲಿರುವ ವ್ಯವಹಾರ ಅಥವಾ ಚಟುವಟಿಕೆಗೆ ಸಂಬಂಧಿಸಿದ ಅಗತ್ಯ ಕೌಶಲ್ಯ, ಅನುಭವ ಅಥವಾ ಜ್ಞಾನವನ್ನು ವೈಯಕ್ತಿಕ ಸಾಲಗಾರರು ಹೊಂದಿರಬೇಕು.
ಟಿಪ್ಪಣಿ 03: ಅರ್ಜಿದಾರರ ಶೈಕ್ಷಣಿಕ ಅರ್ಹತೆಯು, ಪ್ರಸ್ತಾವಿತ ವ್ಯವಹಾರದ ಸ್ವರೂಪ ಮತ್ತು ಅದರ ಅವಶ್ಯಕತೆಗಳ ಆಧಾರದ ಮೇಲೆ ನಿರ್ಧಾರವಾಗುತ್ತದೆ.
ಅರ್ಜಿ ಪ್ರಕ್ರಿಯೆ
ಆನ್ಲೈನ್ನಲ್ಲಿ ನೋಂದಣಿ ಮಾಡಲು ಕೆಳಗಿನ ದಾಖಲೆಗಳು ಅಗತ್ಯವಿರುತ್ತವೆ :
• ಗುರುತಿನ ಪುರಾವೆ (ID Proof)
• ವಿಳಾಸದ ಪುರಾವೆ (Address Proof)
• ಪಾಸ್ಪೋರ್ಟ್ ಗಾತ್ರದ ಫೋಟೋ
• ಅರ್ಜಿದಾರರ ಸಹಿ
• ವ್ಯವಹಾರ/ಉದ್ಯಮದ ಗುರುತಿನ ಅಥವಾ ವಿಳಾಸದ ಪುರಾವೆ
ನೋಂದಣಿ ಹಂತಗಳು :
ಹಂತ 01: PM MUDRA ಅಧಿಕೃತ ವೆಬ್ಸೈಟ್ಗೆ ಭೇಟಿ ನೀಡಿ, ಬಳಿಕ “ಉದ್ಯಮಿ ಮಿತ್ರ” ಪೋರ್ಟಲ್ ಅನ್ನು ಆಯ್ಕೆಮಾಡಿ.
ಹಂತ 02: ಮುದ್ರಾ ಸಾಲ ವಿಭಾಗದಲ್ಲಿ “ಈಗಲೇ ಅರ್ಜಿ ಸಲ್ಲಿಸಿ” ಎಂಬ ಆಯ್ಕೆಯನ್ನು ಕ್ಲಿಕ್ ಮಾಡಿ.
ಹಂತ 03: ಹೊಸ ಉದ್ಯಮಿ / ಈಗಾಗಲೇ ವ್ಯವಹಾರ ನಡೆಸುತ್ತಿರುವ ಉದ್ಯಮಿ / ಸ್ವ ಉದ್ಯೋಗಿ ವೃತ್ತಿಪರರು ಇವರಲ್ಲಿ ಸೂಕ್ತ ವರ್ಗವನ್ನು ಆಯ್ಕೆಮಾಡಿ.
ಹಂತ 04: ಅರ್ಜಿದಾರರ ಹೆಸರು, ಇಮೇಲ್ ವಿಳಾಸ ಮತ್ತು ಮೊಬೈಲ್ ಸಂಖ್ಯೆಯನ್ನು ನಮೂದಿಸಿ OTP ರಚಿಸಿ ನೋಂದಣಿಯನ್ನು ಪೂರ್ಣಗೊಳಿಸಿ.
ಯಶಸ್ವಿ ನೋಂದಣಿಯ ನಂತರ :
ಹಂತ 01: ವೈಯಕ್ತಿಕ ಹಾಗೂ ವೃತ್ತಿಗೆ ಸಂಬಂಧಿಸಿದ ವಿವರಗಳನ್ನು ಭರ್ತಿ ಮಾಡಿ.
ಹಂತ 02: ಯೋಜನಾ ಪ್ರಸ್ತಾವನೆ ತಯಾರಿಸಲು ಸಹಾಯ ಬೇಕಾದರೆ ಹ್ಯಾಂಡ್ಹೋಲ್ಡಿಂಗ್ ಏಜೆನ್ಸಿಗಳನ್ನು ಆಯ್ಕೆಮಾಡಬಹುದು. ಇಲ್ಲದಿದ್ದರೆ “ಸಾಲ ಅರ್ಜಿ ಕೇಂದ್ರ” ಆಯ್ಕೆಯನ್ನು ಕ್ಲಿಕ್ ಮಾಡಿ ಮುಂದುವರಿಯಿರಿ.
ಹಂತ 03: ಅಗತ್ಯವಿರುವ ಸಾಲದ ವರ್ಗವನ್ನು ಆಯ್ಕೆಮಾಡಿ – ಮುದ್ರಾ ಶಿಶು / ಮುದ್ರಾ ಕಿಶೋರ್ / ಮುದ್ರಾ ತರುಣ್.
ಹಂತ 04: ವ್ಯವಹಾರದ ಹೆಸರು, ಚಟುವಟಿಕೆಯ ವಿವರಗಳು ಮತ್ತು ಉದ್ಯಮದ ಸ್ವರೂಪವನ್ನು ನಮೂದಿಸಿ. ಉತ್ಪಾದನೆ, ಸೇವೆ, ವ್ಯಾಪಾರ ಅಥವಾ ಕೃಷಿ ಸಂಬಂಧಿತ ಚಟುವಟಿಕೆಗಳಲ್ಲಿ ಒಂದನ್ನು ಆಯ್ಕೆಮಾಡಿ.
ಹಂತ 05: ಮಾಲೀಕರ ವಿವರಗಳು, ಪ್ರಸ್ತುತ ಬ್ಯಾಂಕಿಂಗ್ ಅಥವಾ ಕ್ರೆಡಿಟ್ ಸೌಲಭ್ಯಗಳ ಮಾಹಿತಿ, ಅಗತ್ಯವಿರುವ ಹೊಸ ಸಾಲದ ವಿವರಗಳು, ಭವಿಷ್ಯದ ಆದಾಯ ಅಂದಾಜುಗಳು ಹಾಗೂ ಆಯ್ಕೆಮಾಡಿದ ಸಾಲದಾತರ ವಿವರಗಳನ್ನು ಭರ್ತಿ ಮಾಡಿ.
ಹಂತ 06: ಅಗತ್ಯವಿರುವ ಎಲ್ಲಾ ದಾಖಲೆಗಳನ್ನು ಲಗತ್ತಿಸಿ – ಗುರುತಿನ ಪುರಾವೆ, ವಿಳಾಸದ ಪುರಾವೆ, ಫೋಟೋ, ಸಹಿ ಹಾಗೂ ವ್ಯವಹಾರದ ದಾಖಲೆಗಳು.
ಹಂತ 07: ಅರ್ಜಿಯನ್ನು ಸಲ್ಲಿಸಿದ ನಂತರ ವ್ಯವಸ್ಥೆಯ ಮೂಲಕ ಅರ್ಜಿ ಸಂಖ್ಯೆ ನೀಡಲಾಗುತ್ತದೆ. ಭವಿಷ್ಯದಲ್ಲಿ ವಿಚಾರಣೆ ಅಥವಾ ಟ್ರ್ಯಾಕಿಂಗ್ ಮಾಡಲು ಆ ಸಂಖ್ಯೆಯನ್ನು ಸುರಕ್ಷಿತವಾಗಿ ಸಂಗ್ರಹಿಸಿಡಬೇಕು.
ಅಗತ್ಯವಿರುವ ದಾಖಲೆಗಳು
ಶಿಶು ಸಾಲಕ್ಕಾಗಿ
- ಗುರುತಿನ ಪುರಾವೆ: ಮತದಾರರ ಗುರುತಿನ ಚೀಟಿ / ಚಾಲನಾ ಪರವಾನಗಿ / ಪ್ಯಾನ್ ಕಾರ್ಡ್ / ಆಧಾರ್ ಕಾರ್ಡ್ / ಪಾಸ್ಪೋರ್ಟ್ ಅಥವಾ ಸರ್ಕಾರದಿಂದ ನೀಡಲಾದ ಫೋಟೋ ಐಡಿ ಕಾರ್ಡ್ನ ಸ್ವಯಂ-ದೃಢೀಕೃತ ಪ್ರತಿ.
- ನಿವಾಸದ ಪುರಾವೆ: ಇತ್ತೀಚಿನ ದೂರವಾಣಿ ಬಿಲ್ / ವಿದ್ಯುತ್ ಬಿಲ್ / ಆಸ್ತಿ ತೆರಿಗೆ ರಶೀದಿ / ಮತದಾರರ ಗುರುತಿನ ಚೀಟಿ / ಆಧಾರ್ ಕಾರ್ಡ್ / ಮಾಲೀಕ ಅಥವಾ ಪಾಲುದಾರರ ಬ್ಯಾಂಕ್ ಪಾಸ್ಬುಕ್ ಅಥವಾ ಬ್ಯಾಂಕ್ ಅಧಿಕಾರಿಗಳಿಂದ ದೃಢೀಕರಿಸಲಾದ ಇತ್ತೀಚಿನ ಖಾತೆ ವಿವರ / ನಿವಾಸ ಪ್ರಮಾಣಪತ್ರ / ಸರ್ಕಾರ ಅಥವಾ ಸ್ಥಳೀಯ ಸಂಸ್ಥೆಯಿಂದ ನೀಡಲಾದ ಪ್ರಮಾಣಪತ್ರ.
- ಇತ್ತೀಚಿನ ಬಣ್ಣದ ಛಾಯಾಚಿತ್ರ: 2 ಪ್ರತಿಗಳು
- ಯಂತ್ರೋಪಕರಣಗಳ ದರಪಟ್ಟಿ: ಖರೀದಿಸಲು ಉದ್ದೇಶಿಸಿರುವ ಯಂತ್ರಗಳು ಅಥವಾ ಇತರೆ ವಸ್ತುಗಳ ವಿವರವಾದ ದರಪಟ್ಟಿ.
- ಪೂರೈಕೆದಾರರ ವಿವರಗಳು: ಪೂರೈಕೆದಾರರ ಹೆಸರು, ಯಂತ್ರೋಪಕರಣಗಳ ವಿವರಗಳು, ಅವುಗಳ ಬೆಲೆ ಮತ್ತು ಖರೀದಿಸಬೇಕಾದ ವಸ್ತುಗಳ ಮಾಹಿತಿ.
- ವ್ಯವಹಾರ ಗುರುತು/ವಿಳಾಸದ ಪುರಾವೆ: ಸಂಬಂಧಿತ ಪರವಾನಗಿ, ನೋಂದಣಿ ಪ್ರಮಾಣಪತ್ರಗಳು, ಮಾಲೀಕತ್ವದ ದಾಖಲೆಗಳು ಹಾಗೂ ವ್ಯವಹಾರ ಘಟಕದ ವಿಳಾಸಕ್ಕೆ ಸಂಬಂಧಿಸಿದ ಇತರೆ ದಾಖಲೆಗಳು.
ಕಿಶೋರ್, ತರುಣ್ ಮತ್ತು ತರುಣ್ ಪ್ಲಸ್ ಸಾಲಗಳಿಗಾಗಿ
- ಗುರುತಿನ ಪುರಾವೆ: ಮತದಾರರ ಗುರುತಿನ ಚೀಟಿ / ಚಾಲನಾ ಪರವಾನಗಿ / ಪ್ಯಾನ್ ಕಾರ್ಡ್ / ಆಧಾರ್ ಕಾರ್ಡ್ / ಪಾಸ್ಪೋರ್ಟ್ನ ಸ್ವಯಂ-ದೃಢೀಕೃತ ಪ್ರತಿ.
- ನಿವಾಸದ ಪುರಾವೆ: ಇತ್ತೀಚಿನ ದೂರವಾಣಿ ಬಿಲ್, ವಿದ್ಯುತ್ ಬಿಲ್, ಆಸ್ತಿ ತೆರಿಗೆ ರಶೀದಿ, ಮತದಾರರ ಗುರುತಿನ ಚೀಟಿ, ಆಧಾರ್ ಕಾರ್ಡ್ ಅಥವಾ ಮಾಲೀಕರು / ಪಾಲುದಾರರು / ನಿರ್ದೇಶಕರ ಪಾಸ್ಪೋರ್ಟ್.
- ಇತ್ತೀಚಿನ ಬಣ್ಣದ ಛಾಯಾಚಿತ್ರ: 2 ಪ್ರತಿ
- ವ್ಯವಹಾರ ಗುರುತು/ವಿಳಾಸದ ಪುರಾವೆ: ಸಂಬಂಧಿತ ಪರವಾನಗಿಗಳು, ನೋಂದಣಿ ಪ್ರಮಾಣಪತ್ರಗಳು, ಮಾಲೀಕತ್ವ ದಾಖಲೆಗಳು ಮತ್ತು ಇತರೆ ಸಂಬಂಧಿತ ದಾಖಲೆಗಳು
- ಕ್ರೆಡಿಟ್ ಸ್ಥಿತಿ: ಅರ್ಜಿದಾರರು ಯಾವುದೇ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಯಲ್ಲಿ ಸುಸ್ತಿದಾರರಾಗಿರಬಾರದು.
- ಬ್ಯಾಂಕ್ ಖಾತೆ ವಿವರ: ಕಳೆದ ಆರು ತಿಂಗಳ ಖಾತೆಯ ವಿವರ (ಅಸ್ತಿತ್ವದಲ್ಲಿರುವ ಬ್ಯಾಂಕ್)
- ಆರ್ಥಿಕ ದಾಖಲೆಗಳು: ಕಳೆದ ಎರಡು ವರ್ಷಗಳ ಬ್ಯಾಲೆನ್ಸ್ ಶೀಟ್ಗಳು ಹಾಗೂ ಆದಾಯ ತೆರಿಗೆ / ಮಾರಾಟ ತೆರಿಗೆ ರಿಟರ್ನ್ಗಳು (ರೂ. 2 ಲಕ್ಷ ಮತ್ತು ಹೆಚ್ಚಿನ ಸಾಲಗಳಿಗೆ ಅನ್ವಯಿಸುತ್ತದೆ).
- ಯೋಜಿತ ಬ್ಯಾಲೆನ್ಸ್ ಶೀಟ್: ಕಾರ್ಯನಿರತ ಬಂಡವಾಳದ ಸಂದರ್ಭದಲ್ಲಿ ಒಂದು ವರ್ಷದ ಯೋಜಿತ ವಿವರಗಳು, ಹಾಗೂ ಅವಧಿ ಸಾಲದ ಸಂದರ್ಭದಲ್ಲಿ ಸಾಲದ ಅವಧಿಗೆ ಸಂಬಂಧಿಸಿದ ಯೋಜಿತ ಬ್ಯಾಲೆನ್ಸ್ ಶೀಟ್ಗಳು (ರೂ. 2 ಲಕ್ಷ ಮತ್ತು ಹೆಚ್ಚಿನ ಸಾಲಗಳಿಗೆ ಅನ್ವಯಿಸುತ್ತದೆ).
- ಪ್ರಸ್ತುತ ಮಾರಾಟ ವಿವರ: ಅರ್ಜಿ ಸಲ್ಲಿಸುವ ದಿನಾಂಕದವರೆಗೆ ಪ್ರಸ್ತುತ ಹಣಕಾಸು ವರ್ಷದಲ್ಲಿ ಸಾಧಿಸಿದ ಮಾರಾಟದ ಮಾಹಿತಿ.
- ಯೋಜನಾ ವರದಿ: ತಾಂತ್ರಿಕ ಹಾಗೂ ಆರ್ಥಿಕ ಕಾರ್ಯಸಾಧ್ಯತೆಯನ್ನು ವಿವರಿಸುವ ಸಮಗ್ರ ಯೋಜನಾ ವರದಿ.
- ಕಾನೂನು ದಾಖಲೆಗಳು: ಕಂಪನಿಯ ಜ್ಞಾಪಕ ಪತ್ರ (Memorandum) ಮತ್ತು ಸಂಘದ ವಿಧಿಗಳು / ಪಾಲುದಾರಿಕೆ ಪತ್ರ ಇತ್ಯಾದಿ.
- ಆಸ್ತಿ ಮತ್ತು ಹೊಣೆಗಾರಿಕೆ ಹೇಳಿಕೆ: ಮೂರನೇ ವ್ಯಕ್ತಿಯ ಖಾತರಿ ಇಲ್ಲದಿದ್ದಲ್ಲಿ, ನಿರ್ದೇಶಕರು ಮತ್ತು ಪಾಲುದಾರರು ಸೇರಿದಂತೆ ಸಾಲಗಾರರ ನಿವ್ವಳ ಮೌಲ್ಯವನ್ನು ತಿಳಿಯಲು ಆಸ್ತಿ-ಹೊಣೆಗಾರಿಕೆ ವಿವರಗಳನ್ನು ಸಲ್ಲಿಸಬೇಕಾಗುತ್ತದೆ.
ಈ ದಾಖಲೆಗಳನ್ನು ಸರಿಯಾಗಿ ಸಿದ್ಧಪಡಿಸಿದರೆ ಸಾಲ ಮಂಜೂರು ಪ್ರಕ್ರಿಯೆ ವೇಗವಾಗಿ ಪೂರ್ಣಗೊಳ್ಳಲು ಸಹಾಯವಾಗುತ್ತದೆ.